Wala nanugon ang Commission on Elections (Comelec) Region VI sa ila nga mga preparasyon nga ginhimo apisar nga gin-postpone man ang Barangay and Sangguniang Kabataan Elections (BSKE) nga natalana kuntani sa Nobyembre 2, 2026.
Sa interview sang Bombo Radyo kay Atty. Dennis Ausan, director sang Comelec Western Visayas, iya ginpahayag nga nalakip sa ila ginkasakuan amo ang briefing sa mga mapadalagan kuntani sa eleksyon.
Bisan wala nadayon suno kay Ausan, ginakabig na lamang nila ini nga Voter Education nga kabahin man sang adbokasiya sang ahensya.
“Wala man naton ginakanugunan ini. Pareho sina sa mga briefing sa mga aspirants. Ini nga activity gina-consider na man lang naton nga voter education suno man sa adbokasiya sang aton commission,” suno kay Ausan.
Dugang sini, nakasapol naman sila sa mga katapo sang law enforcement agencies kaangay sang pulis, mga soldado, kag Coast Guard nga para naman kuntani sa pagbukas sang election period.
Ini nga bahin suno kay Ausan gina-konsiderar na lamang nila nga pagpabaskog sang ila nga kooperasyon sa iban nga mga ahensya.
“Wala naton ginakanugunan ina, kay at least, we are strengthening our network with them, kay sa adlaw-adlaw nga tanan, we need also our partners,” dugang sang director.
Nahibaluan nga matapos ginpirmahan ni President Ferdinand Marcos Jr. ang layi nga naga-postpone sang eleksyon, ginkanselar naman sang Comelec ang tanan nila nga aktibidad nga naangot sa BSKE.
Suno kay Comelec Chairman George Erwin Garcia, lakip sa ginkansela ang filing sang certificates of candidacy nga matabo kuntani sa September 28 – October 5.
Lifted naman ang mga prohibition sa social services kag public works.
Septyembre 24 sang ginpirmahan ni Marcos ang Republic Act 12326, apang ginpahibalo lamang ini sa publiko kaina. Paagi sa amo nga layi, ginpasaka man sa lima ka tuig ang termino sang mga opisyal sang barangay kag SK.#
