Liwat nga magahatag sang dugo ang Battalion Advisory Group for Police Transformation and Development sang Regional Mobile Force Battalion-Western Visayas sa nagahilapit nga Dugong Bombo 2026 sa Nobyembre 14.
Sa interview sang Bombo Radyo kay Dr. Allen R. Camering, Chairperson sang grupo, iya ginpahayag nga indi na bag-o sa ila ang pagbuylog sa programa, nga nagatuyo nga makabulig sa pagsalbar sang kabuhi.
Suno kay Camering, isa ka dungog para sa hanay sang kapulisan nga mangin kabahin sang hilikuton nga may direkta nga kontribusyon sa pagsugpon sang kabuhi sang mga Pilipino.
Ang Dugong Bombo isa ka makahulugan nga programa sang Bombo Radyo Philippines, in partnership with Bombo Radyo Philippines Foundation, Inc. kag Philippine Red Cross, nga dululungan nga patigayunon sa bilog nga pungsod kun sa diin may yara sang Bombo Radyo kag Star FM stations.
Sa Iloilo, patigayunon ang aktibidad sa Iloilo Science and Technology University (ISAT-U) sa La Paz, Iloilo City.
Bilang pagkilala sa ila pagdonar sang dugo, makabaton sang limited-edition Dugong Bombo T-shirt, vitamins, kag hot meals ang mga successful blood donors.
