Ginmanduan ni Iloilo City Mayor Raisa Treñas ang City Legal Office nga i-review kag gilayon nga pasakaan sang nagakaigo nga kaso ang duha ka driver matapos nabungguan ang duha ka street sweepers sang General Services Office (GSO).
Ginpahayag ni Treñas nga nasuboan siya sang natabo, ilabi na nga ginapatihan nga nakainom ang duha ka driver.
Suno kay Treñas, ang isa ka street sweeper ang nabungguan sang motorsiklo sa Barangay Old Iloilo Airport, Mandurriao, samtang ang isa pa ang naigo sang basurahan asta nabungguan sang pick-up sa Barangay Avanceña, Molo.
Ginpasiguro man ni Treñas nga sabton sang siyudad ang gasto sa ospital sang duha ka street sweepers.
Samtang, padayon pa nga ginabulong sa Western Visayas Medical Center ang sweeper nga naaksidente sa Old Airport, samtang outpatient na ang isa.
Apang suno kay GSO Head Engineer Neil Ravena, ang 52-anyos nga babayi nga sweeper sa Mandurriao nakaangkon sang bali sa gusok kag ginatan-aw ang posibilidad sang injury sa spinal cord.
Samtang, ginapatun-an sang alkalde ang dugang nga mga tikang agud mapalig-on ang seguridad sang mga street sweeper nga nagasugod sa ila obra alas-tres pa lang sang kaagahon, samtang madulom pa ang palibot.
Lakip sa ginakonsiderar ang paggamit sang mga suga nga mahimo itakod sa bayo sang mga sweeper agud mas makita sila sang mga motorista.
May reflectorized vest kag uniporme nga may reflectorized portions na sila, suno kay Ravena, apang limitado ang vest kag indi ini magamit sa masunod nga adlaw kung mabasa.
Magapakig-angot man si Treñas sa Philippine National Police agud mapatuman ang paghatag sang breath analyzer nga makabulig sa pag-usisa kung nakainom ang mga driver.
Text by: Bombo Cyrene A. Nasis
