Liwat nga nagpanawagan ang Malacañang kay Senator Ronald “Bato” Dela Rosa nga mag-surrender na sa mga otoridad kag indi mangin ehemplo sa iban nga mga pugante paagi sa pagpanago.
Ini matapos gin-anunsyo sang Department of the Interior and Local Government (DILG) ang P50-million nga padya para sa pagdakop kay Dela Rosa nga ginakabig sang ahensya nga ‘armed and dangerous.’
Naghatag man ang Philippine National Police (PNP) kay Dela Rosa sang isa ka semana nga ultimatum ukon deadline agud magsungka.
Suno kay Palace Press Officer Undersecretary Claire Castro, ginhatagan ang senador sang tion agud boluntaryo nga magsungka kag malikawan na ang dugang nga operasyon sang kapulisan.
“Pero kung ang isang tao na pinapa-surrender ay nagmamatigas at parang binabalewala ang batas at ang gobyerno at mga law enforcers natin, patuloy na siya ay hahagilapin at hindi magsasa-balewala, hindi tutulugan ito, lalong lalo na ng ating mga kapulisan,” pahayag sang Palace official.
Gindugang niya ang nauna nga tinaga ni Remulla nga wala sang kaluoy nga ipakita ang DILG kun indi mag-surrender ang senador pagkatapos sang isa ka semana nga deadline.
Suno pa kay Castro, bilang nagapungko nga senador kag anay hepe sang PNP, dapat si Dela Rosa ang mangin una nga mangin ehemplo sa pagtahod sa layi.
“‘Wag siyang maging ehemplo, ‘wag siyang maging modelo sa mga taong merong kinakaharap na warrant of arrest at magtatago,” suno sa Palace press officer.
“‘Wag siyang maging ehemplo para sa ibang mga, sabihin nating mga pugante, na magtago dahil siya ang gagawing idolo,” dugang sini.
Samtang, ginpahayag sang PNP nga wala pa sila nakabaton sang bisan ano nga mensahe ukon indikasyon halin sa kampo ni Dela Rosa nga handa na ini mag-surrender, apang nagpadala na sila sang dugang nga mga tracker team agud pangitaon siya.
Nagapangatubang si Dela Rosa sang warrant of arrest sang International Criminal Court (ICC) may kaangtanan sa drug war sang ni anay Presidente Rodrigo Duterte.
Yara na si Duterte sa detention sang ICC sa The Hague, Netherlands, samtang nagahulat sang paghusgar sa iya kaso nga crimes against humanity ukon krimen batok sa katawhan.#
