Subong nga nagahilapit na ang Pista Minatay, ginpakigbahin ni Engineer Neil Ravena, head sang General Services Offices nga temporaryo nila nga ginpauntat ang pagdemolish sang nagkalaguba nga mga pantyon sa Tanza Public Cemetery.
Kasunod ini sang natapos na man nga pag-exhume sang mga tul-an sa nasambit nga patyo.
Sa interview sang Bombo Radyo kay Ravena, iya ginpahayag nga bangud man sa palaabuton nga Pista Minatay, temporaryo man nga pagatabunan ang nasambit nga mga tul-an agud malikawan nga ma-expose ini sa publiko.
Ginpatigayon ang nasambit nga paghalin sang mga tul-an matapos ang mga bagyo kag mabaskug nga pag-ulan nga nagtuga sang damage sa mga pantyon.
Madumduman nga pagkatapos sang rehabilitasyon sang Tanza Public Cemetery, ginpahayag ni Iloilo City Mayor Raisa Treñas nga sunod nga target sang siyudad ang Quintin Salas Public Cemetery kag Jereos Public Cemetery.
Kabahin ini sang “from womb to tomb” program sang administrasyon nga nagatuyo nga maghatag sang serbisyo sa mga Ilonggo halin sa pagkatawo tubtob sa katapusan sang kabuhi.
