Nagrekomendar ang Iloilo City Traffic and Transportation Management Office (ICTTMO) sa pagpanas sang pedestrian lane sa atubang sang Iloilo City Police Office (ICPO) sa General Luna Street, City Proper.
Sa interview sang Bombo Radyo kay ICTTMO Head Retired Colonel Uldarico Garbanzos, iya ginpahayag nga wala niya nahibaluan kun ginpahamtang ini sang Department of Public Works and Highways (DPWH) ukon sang Iloilo City Government.
Ginpaathag ni Garbanzos nga bisan pa may pedestrian lane na, ginpadayon sang ICPO ang paggamit sang amo nga porsyon bilang emergency access para sa ila mga salakyan.
Nahibaluan nga verbal agreement lamang sa tunga sang ICPO kag ICTTMO ang pag-allow sa mga patrol vehicle nga magliko sa nasambit nga lugar.
Ginalantaw man sang ICTTMO ang pagbalhin sang pedestrian lane sa mas luwas nga lokasyon, posible malapit sa traffic light sa junction sang General Luna kag Mabini Streets, ukon sa atubang sang University of San Agustin, nga mas malapit sa signalized intersection.
Plano man ni Garbanzos nga ipatawag ang ICPO para klaruhon nga ang pagliko sa amo nga porsyon dapat para lamang sa emergency response.
Ini kasunod sang ginpahayag nga “significant safety concern” sang Land Transportation Office (LTO) 6, nga naghingyo sa ICTTMO nga liwat nga usisaon ang ila arrangement sa ICPO kag i-assess ang posible nga peligro sa mga nagatabok kag mga motorista.
By: Bombo Cyrene Nasis
