Nagpaandam ang Iloilo Police Provincial Office batok sa ilegal nga sugal sa mga bilasyonan nga mahimo dakpon sang mga awtoridad.
Sa interview sang Bombo Radyo kay Police Lieutenant Colonel Arnel Solis, spokesperson sang Iloilo Police Provincial Office, iya ginpahayag nga ginakabig nga ilegal nga sugal ang mga hampang nga may kaangtanan sa kwarta, kaangay sang paghampang sang baraha nga may pusta.
Ginapanugyanan man sini ang publiko nga likawan ang ilegal nga sugal, indi lamang sa mga bilasyonan kundi sa bisan diin man nga lugar.
Suno pa sa opisyal, may mga indibidwal na nga nadakpan sa nagkalain-lain nga operasyon batok sa illegal gambling.
Apang, sa bahin sang mga nagapulaw sa mga bilasyonan sa probinsya, wala pa sila sang nadakpan sa amo nga aktibidad.
Gin-athag man niya nga dakpon nila kag presuhon ang mga maabtan sang kapulisan nga nagapatigayon sang ilegal nga buluhaton.
Nahibaluan nga sa idalom sang Presidential Decree No. 1602 kag sang Republic Act No. 9287 ginadumilian ang pagpasugal sa namatyan ukon belasyunan.
