Ginbuyagyag sang former aid ni anay Department of Public Works and Highways (DPWH) Undersecretary Roberto Bernardo nga nagdul-ong siya sang minaleta kag mga kahon nga wala mahibaluan kun ano ang unod sa mga suspendido nga senador nga sanday Senador Jinggoy Estrada, former Senator Bong Revilla, ex-DPWH Secretary Manuel Bonoan kag iban pa nga mga matag-as nga opisyales.
Ini ang nangin testimonya ni Vergel Nino Garcia sa hearing sang Sandiganbayan Fifth Division para sa petisyon sa piyansa ni Estrada naangot sa kaso nga plunder nga nagabalor P573 million may kaangtanan sa mga kickbacks halin sa flood control projects sang gobyerno.
Suno kay Garcia, ginsugo siya ni Bernardo nga magdul-ong sang 12 ka kahon para kay Estrada sa Artiaga Building sa San Juan City sang Nobyembre 2024.
Kaupod niya sa pagdul-ong amo ang driver ni Bernardo nga si Francisco dela Fuente apang wala siya nakakuha sang litrato ukon video kag wala man nila nga nakit-an ang sulod sang kahon.
Sa tion sang iya pagdul-ong, pahayag niya nga nasiplatan niya si Estrada nga naka T-Shirt kag leather shoes.
Dugang pa niya, involved man diri sanday ex-Senator Bong Revilla nga nakabaton tubtob 12 ka kahon, anay DPWH Secretary Manuel Bonoan nga nakabaton sang 15 ka kahon, ex-DPWH Undersecretary Maria Catalina Cabral nga may isa ka kahon kag paper bag nga nabaton, kag si anay Education Undersecretary Trygve Olaivar nga nakabaton sang walo ka maleta kag 15 ka kahon.
Dugang pa, nagtestigo man si ex-DPWH-National Capital Region Director Gerard Opulencia nga may lapnagon nga 5-8 percent kickba22cks nga ginatawag “pasasalamat” para sa pila ka mga opisyales sang DPWH, luwas sa 25 percent nga “commitment fee.”
Magapadayon ang hearing sang kaso sa Nobyembre 4.
