Gin-athag ni Interior Secretary Jonvic Remulla nga ‘person deprived of liberty’ na ang status ni former House Speaker kag Leyte First District Representative Martin Romualdez.
Ini matapos nga ginserbehan na sang arrest warrant kaangot sa kaso nga plunder ukon pagpangawat sang daku nga kantidad sang kwarta sang gobyerno.
Suno kay Remulla, gin-admit si Romualdez sa Cardinal Santos Medical Center sa San Juan City bangud sa “cardiovascular event.”
Ginpahayag sang tiglikom nga may armado nga mga pulis sa guwa sang kwarto ni Romualdez kag sa lobby sang ospital.
Suno pa sa opisyal, matapos mabasahan si Romualdez sang iya mga kinamatarong, ginakabig na siya nga “person deprived of liberty.”
“In the meantime, we have armed guards outside this door. We have armed police outside the hospital and in the lobby,” pahayag ni Remulla. “He is now considered, after we read him his rights, a person deprived of liberty.”
Nahibaluan nga antes sini, nagmandu ang Third Division sang Sandiganbayan nga dal-on ang kongresista sa government custody.
Ini matapos ginpasakaan sang kaso sang Office of the Ombudsman si Romualdez sa Sandiganbayan subong nga adlaw bangud sa alegasyon nga nakabaton siya sang P7.44-billion nga kickback halin sa mga flood control, infrastructure kag iban pa nga proyekto sang gobyerno halin 2022 tubtob 2025.
Samtang, ginpahayag ni PNP-CIDG NCR chief Colonel John Guiagui nga naagyan ni Romualdez ang booking procedures apang wala na ini ginpilit nga mapatindog bangud sa iya nga medical condition.
Ginpahayag man ni Guiagui nga ginbutangan na lamang si Romualdez sang orange detainee shirt sa ibabaw sang iya lawas bangud may mga medical apparatus nga nakakabit sa iya.
Ginkumpirmar man sang sheriff sang Third Division ang kondisyon ni Romualdez samtang ginbisita man siya sang iya mga abogado.
Suno kay Guiagui, ibalik sang CIDG sa Sandiganbayan sa Martes sang aga ang arrest warrant, kaupod ang report parte sa medical condition sang anay House Speaker.
Kaupod ni Romualdez sa kaso si anay House Appropriations Committee chairperson kag resigned Ako Bicol party-list Representative Zaldy Co, ang personal aide ni Romualdez kag ang presidente sang isa ka foreign exchange corporation.
Si Co, suno sa CIDG, yara gihapon sa gwa sang pungsod kag wala pa nadakpan. Samtang, ang duha pa ka akusado wala pa nagpakita sang intensyon nga magsungka sa awtoridad.#
