Nagpanawagan ang Iloilo City Police Office (ICPO) sa publiko nga likawan nga mag-post sa social media kun sa diin ang ila nga kadtuan ukon kun ano ang ila aktibidad kadungan sang Pista Minatay.
Suno kay ICPO Director Police Colonel Wilbert Parilla, mahimo nga gamiton sang mga kriminal ang mga impormasyon nga ini agud nga makakuha sang kahigayunan ukon tyempo nga makapangawat sa mga balay nga wala sang tawo.
Isa ini sa gina-address sang kapulisan ilabi na nga kadam-an sang mga pumuluyo ang nagabiya gid sa ila puluy-an sa sini nga tyempo agud nga magbisita sa ila nga mga minatay.
“They don’t have to post sa mga Facebook nila kun saan sila aalis, saan sila pupunta, anong oras sila aalis… para wala namang lead,” suno kay Parilla.
Ginabanta nga magalab-ot sa 350,000 ang magadugok sa mga patyo sa syudad sang Iloilo umpisa subong nga Oktubre 31 tubtub sa Nobyembre.
Magluwas diri, nagpaandam man ang talatapan batok sa theft kag pickpocketing nga amo ang nagapanguna nga krimen nga ginabantayan sa tigkalalag.
Suno kay Parilla, kun madamo ang tawo sa patyo, nagahingalit man ang kawatan nga makapangita sang biktima.
Nagpahanumdom ang ICPO sa publiko nga magdoble sa pagbantay sa kagamitan kag likawan nga magsuksok sang mga alahas kun magbisita na sa patyo.
Nakahanda man ang opisina sang 30 police assistance desks sa nanuhay-tuhay nga estratehiko nga mga lughar sa syudad lakip na ang mga patyo, transport terminal, pantalan, kag shopping malls.
Sakop sa ginabantayan nga seguridad ang 19 ka mga patyo kun sa diin 10 ang public kag siyam ang private; tatlo ka mga pantalan; kag pito ka mga transport terminal.#
