Bastante ang units sang Western Visayas Transport Cooperative (WVTC) nga magabiyahe bwas nga adlaw para sa ginapaabot nga pagpug-ok sang mga pasahero halin sa probinsya matapos ang Pista Minatay.
Sa interview sang Bombo Radyo kay Raymundo “Boyet” Parcon, chairman sang amo nga transport cooperative, iya ginpahayag nga 100% ang biyahe sang mga units sa bwas nga adlaw agud ma-cater ang mga pasahero nga halin sa probinsya, apang gin-ako man ni Parcon nga posible may ara sang pagka-delay bangud sa mabug-at nga trapiko.
Pahayag ni Parcon, ang Mohon Terminal amo ang may pinakamadamo nga pasahero kag halin sa nasambit nga lugar pakadto sa City Proper kag sa UP stoplight amo ang masami nga ginahalinan sang trapiko labi na kun kada Lunes nga adlaw bangud may klase.
Sa pihak nga bahin, ginpaathag naman ni Parcon nga sa kada unit sang modernized bus, 10 lang ka pasahero ang mahimo nga magtindog.
Posible suno sa iya nga ma-suspend sang 90 days ang driver kag may yara sang masobra P6,000 nga multa kun madakpan nga masobra sa 10 ang pasahero nga nagatindog sa sulod sang bus.
Nagpangabay man si Parcon nga hangpon sang publiko ang sitwasyon sa tunga sang dalan bangud bastante man ang units apang mas madamo gihapon ang mga pasahero nga kinahanglan.
