Patigayunon ang readjustment sa pag-deploy sang mga kapulisan sa Iloilo City bwas, Nobyembre 3, matapos ang duha ka adlaw nga pagbantay sa mga patyo kag strategic areas para sa Pista Minatay.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga bangud sa posibilidad nga malaka na lang ang mga tawo nga magduaw sa patyo, mahimo nga sayluhon ang iban sa mga terminal bangud ginaekspektar ang pagbalik eskwela kag trabaho bwas nga adlaw.
Suno kay Sangrines, wala man sang may na-rekord nga insidente sa ila nga pag-monitor sa tigkalalag.
Kasunod sini, ginpahayag ni Sangrines nga padayon sa gihapon ang pag-alerto sang mga personnel, indi lang sa mga patyo kundi pati man sa mga terminal.
Luyag man ipalab-ot ni Sangrines nga dapat doble ang paghalong kag siguruhon ang mga kagamitan agud indi masalisihan apisar nga nagadali ang tanan nga magbalik kag magpahuway.
Amo man kun sa tunga sang dalan nga gabiyahe kag kun may dala nga salakyan.
Ginahingyo man ni Sangrines nga mangin mapinasensiyahon kun may ginapatigayon nga safety measures ang mga kapulisan.
