Ipatuman epektibo sa Nobyembre 19 ang P40 tubtub sa P45 minimum wage increase para sa mga mamumugon sa pribado nga sector sa Western Visayas.
Ini matapos nga gin-aprubahan na sang National Wages and Productivity Commission nga attached agency sang Department of Labor and Employment (DOLE) kag ginsapubliko subong nga adlaw, Nobyembre 3.
Halin sa P550, ipasaka ang current minimum wage sa P590 kada adlaw para sa mga naga-trabaho sa non-agriculture, industrial, kag commercial establishments nga may masobra 10 employees.
Sa mga establisyemento kun sa diin mas manubo sa 10 ang mga empleyado, ang bag-o nga minimum wage amo ang P565 kada adlaw halin sa P525.
Yara man sa P565 ang bag-o nga wage rate para sa agriculture workers halin anay sa P520 nga sweldo kada adlaw.
Ang mga kabulig sa balay naman ang makabaton sang dugang nga P500 kada bulan nga amo ang magapasaka sang ila nga monthly minimum salary sa P7,000.
Sa interview sang Bombo Radyo kay Regional Tripartite Wages and Productivity Board-6 (RTWPB-6) Chairperson Sixto T. Rodriguez, iya ginpahayag nga ginahulat nila nga makabalik sa ila ang papeles nga aprubado na sa national level.
15 ka adlaw matapos ang mabalhag ang order, iga-require na ang employers nga ipatuman ini sa bilog nga Western Visayas.
Nagpahanumdom si Rodriguez nga bilog nga board ang nagdesisyon sini sa bulig sang mga representative kag kasunod man sang mga public hearing nga ginpatigayon, gani nga dapat sundon sang nasakpan nga mga employer.
Una na nga ginpahayag ni Rodriguez nga apisar sang mga apelar halin sa employer groups nga i-defer anay ang wage increase, nag-isyu sila sang bag-o nga wage order agud proteksyunan ang mga mamumugon samtang ginasigurado man nga makapadayon sa pag-operate ang mga negosyo.#
