Nagpasalamat ang City Budget Office (CBO) kay Vice Mayor Lady Julie Grace “Love-Love” Baronda sa pagpabutyag sang mga isyu kag pamangkot may kaangtanan sa proposed 2027 budget.
Sa ila official statement, ginpahayag sang CBO nga gina-acknowledge nila ang concern ni Baronda kag nakita man sang Finance Committee nga kinahanglan pa nga magstep-up sa pagpatigayon sang education campaign agud nga mangin klaro sa mga opisyal ang proseso sang pagpreparar sang budget.
“Nagapasalamat kita sa aton Vice Mayor nga tungod sang iya issue nga gin-raise sa media kag socmed page, nakita sang Finance Committee nga kinanglan pa gid namun magstep-up sang pagpatigayon sang education campaign parte sa preparasyon sang budget para aligned ang tanan ang aton pag-intindi ukon paghangop sang proseso,” pahayag sang CBO.
Suno sa CBO, isa ini ka importante nga tikang agud mas masabat ang mga pamangkot kag malikawan ang mga concern parte sa budget prioritization.
Ginklaro man sang opisina nga indi tanan nga programa, proyekto kag aktibidad nga nalakip sa Annual Investment Program (AIP) ang kinahanglan mapondohan sa Annual Budget, bangud mahimo nga mas daku ang kabug-usan nga budgetary requirement sang mga programa kumpara sa estimated receipts sang siyudad.
Dugang pa sini, ang wala mapondohan nga mga programa indi nagakahulugan nga gina-dismiss ukon gina-disapprove na ini, bangud may posibilidad nga makapangita sang iban nga pondo pareho sang loans, donations, national government funds kag Public-Private Partnership agreements.
Ginpahayag man sang CBO nga may koordinasyon ang ila opisina sa Office of the City Treasurer kag Office of the City Planning and Development Coordinator agud masiguro ang klaro nga pagpaathag kag pag-implementar sang sound Public Financial Management.
“Sa liwat, we remain transparent sa aton processes kag bukas ang amon opisina para ma address ang mga queries kag confusions. We look forward for the committee hearings as these can provide the proper platform to discuss in detail every time found in the proposes 2027 budget,” dugang pa sang CBO.
Ginpasalig man sang opisina nga magapabilin sila nga transparent kag bukas sa pagbaton sang mga pamangkot, samtang ginapaabot ang committee hearings agud madetalye nga madiscuss ang tagsa ka item sa proposed 2027 budget.
Text by: Bombo Cyrene Nasis
