Ginarespeto sang Prosecution panel ang ang pag-atras ni Dean Ralph Sarmiento nga magaserbe kuntani bilang nagapanguna nga testigo sa bahin sang depensa sa pagpadayon sang impeachment trial sa Vice President Sara Duterte sa Nobyembre 9.
Ginakonsiderar man sang prosecution nga ang pag-atras nagapakita lamang nga mabug-at kag mabudlay nga depensahan ang alegasyon nga ginahaboy batok kay bise presidente.
Suno kay House Prosecution Panel Representative Joel Chua, nakalab-ot sa ila nga mangin ang ginkuha nga financial expert sang pihak nga kampo ang ginabalibaran ukon wala ginbaton ang pangabay nga mangin testigo.
Paathag pa ni Chua, mabudlay depensahan ang testimoniya halin sa prosekusyon ilabi na nga kilala nga may ara sang masangkad nga credentials kag nag-agi sa maid-id kag madalom nga pagtuon ang mga testigo nga ginkuha sang mga ini.
Dugang pa niya, dapat nga ikonsiderar ang malawig nga tyempo nga mag-atubang sa witness stand bangud sa proseso sang cross examination kag indi basta-basta nga natapos sa sulod sang isa ka semana lamang.
Wala man suno sa iya ginabaton ang anuman nga pahayag nga wala sang nagakaigo nga pagbusisi, gani importante nga mangin mapag-on ang testimoniya sang testigo.
Suno pa kay Chua, padayon na nila nga ginatun-an ang possible nga ipresentar sang mga testigo agud nga handa sila kag insakto ang ila mga aktwasyon sa nagapadayon nga trial sang bise presidente.
