Nakabaton ang Philippine National Police (PNP) sang halos 500 ka mga impormasyon natuhoy sa lokasyon ni Senator Ronald “Bato” Dela Rosa.
Suno kay PNP chief Police General Jose Melencio Nartatez Jr. sa press briefing, na-validate na ang mga impormasyon nga ila nabaton kag gilayon nga ginhatagan sang nagakaangay nga tikang kun sa diin nagpatigayon sila sang police operations sa nagakalain-lain nga bahin sang Pilipinas.
“There are not less than 500 information na dumating na and those were properly validated, pinuntahan po natin at in-operate po natin,” pahayag ni Nartatez.
Dugang pa ni Nartatez, halin Western, Eastern Mindanao, Visayas, Bicol, Southern Tagalog, Northern ukon Central Luzon, kag sa mga isla nga wala pa niya nabatian, ginalibot na sang mga pulis.
Apang, wala nila makit-an ang pugante nga senador sa bisan diin nga lugar nga nasambit pero padayon sa gihapon ang pagpangita sang mga otoridad sa iya.
Kasunod sini, nag-deploy man ang PNP sang tracker teams kag iban pa nga mga personnel para mahibaluan ang lokasyon ni dela Rosa.
Madumduman nga ginapangita sang International Criminal Court (ICC) ang amo nga senador bangud sa kaso sini naangot sa war on drugs ni anay presidente Rodrigo Duterte.
Ginpanindugan man sang Department of the Interior and Local Government (DILG) nga yara ang pugante nga senador sa Mindanao kun sa diin protektado ini sang “armed and powerful group” apang wala gin-identify ang nasambit nga grupo.
Madumduman man nga ginpatungan sa ulo sang 50-million ang nasambit nga senador.
