Gindagdagan na sang Land Transportation Franchising and Regulatory Board (LTFRB) sang show cause order ang isa ka modernized jeep nga nagtakilid samtang nagabyahe sa banwa sang Guimbal, Iloilo.
Sa interview sang Bombo Radyo kay Atty. Joscet Abellar, spokesperson sang LTFRB, iya ginpahayag nga nasambit sa show cause order nga dapat hatagan sang pagpaathag sang nasambit nga unit ang matuod nga natabo.
Nalakip man sa show cause order nga ginahatagan ang unit sang lima ka adlaw agud maghatag sang paathag kun ngaa indi dapat pag i-suspend ang ila franchise.
Dugang pa ni Atty. Abellar, kun mapamatud-an sa imbestigasyon nga may violation sa ila franchise, may pagaatubangon ini nga nagakaangay nga mga penalidad.
Ginpahayag man sang abogado nga dapat antes magbiyahe ang ila mga unit, siguruhon nga maayo ang ila kondisyon kag dapat ginahimo nila ini kada adlaw.
Dugang sini, may salabton man ang kooperatiba kag operator sa natabo nga insidente.
Gindetalye man ni Atty. Abellar ang mga penalidad kun sa diin P5,000 ang multa sa first offense, P10,000 naman sa second offense kag may lakip nga suspension sang franchise.
Para naman sa 3rd ukon last offense, P15,000 na ang ila isukot kay posibilidad sang cancelation sang ila franchise.
Sa subong, gina hulat na lang sang LTFRB ang ila sabat agud ma-evaluate ini kag mahatagan sang nagakaigo nga lihok.
