Ginalantaw sang National Grid Corporation of the Philippines (NGCP) nga makabulig ang pag-deploy sang Battery Energy Storage Systems (BESS) agud makahatag sang dugang nga flexibility kag stability sa mga power systems, samtang ginapaabot ang kakulangan sang suplay sang kuryente sa panahon sang El Niño.
Sa interview sang Bombo Radyo kay Reaghan Alcantara, senior officer sang NGCP, iya ginpahayag nga may yara sila sang inisyatibo nga ginatawag nga “Project Airbag” nga nagatuyo nga ma-maximize ang nagadamo nga solar power plants sa Visayas, lakip na ang Panay Island.
Nahibaluan nga nagkalain-lain ang kapasidad sang proyekto nga mahimo maglab-ot sa 50, 100, kag 150 megawatts.
Suno sa iya, paagi sa BESS, mahimo nga ma-store ang sobra nga kuryente kag makabig ini nga isa ka fast response system nga gilayon nga maka-responde ilabi na kun may yara sang power disruption kun gab-i.
On-going naman ang ila nga pag-deploy sa nagkalain-lain nga parte sang Visayas, lakip diri ang Negros, Cebu, kag Bohol samtang ila naman nga gina-assess ang iban pa nga mga areas sang Panay.
Gin-athag man sang NGCP nga indi tuyo sang BESS nga islan ang mga baseload powerplants nga nagahatag sang padayon kag mas stable nga suplay sang kuryente, sa baylo, magaserbe ini nga suporta sa mga naandan nga power plants.
Sa karun, luyag sang NGCP nga amat-amat na nga masugudan ang pag-deploy sang proyekto sa sini nga tuig.
