Wala pa nasuguran sang Iloilo Provincial Government ang imbestigasyon sa mga reklamo nga ginpalab-ot batok kay Public Information and Community Affairs Office (PICAO) head Nereo Lujan.
Sa interview sang Bombo Radyo kay Atty. Dennis Ventilacion, head sang Provincial Legal Department, iya ginpahayag nga gina-hold anay ini samtang nga wala pa nakadesisyon ang gobernador kun ilakip ang ikatatlo nga reklamo sa amo nga fact-finding investigation.
Ang una nga complaint batok kay Lujan amo ang ginpadala ni City Councilor Jose Maria “Nene” Dela Llana; ginsundan sang reklamo sang Liga ng mga Barangay-Iloilo City Chapter; kag ang ikatatlo amo ang sulat ni Iloilo City Sangguniang Kabataan Federation President Jelma Crystel Implica.
Suno kay Ventilacion, na-endorse na sa ila nga talatapan ang ikatatlo nga reklamo sang Nobyembre 6, kag naka-draft na sila sang show cause order kag ginpadala sa opisina ni Iloilo Governor Arthur Defensor Jr. para sa iya nga konsiderasyon.
Nahibaluan nga nagpadala sang sulat si Implica sa gobernador kun sa diin nakabutang ang ila nga seryoso nga pagkahangawa kag pagkadismaya kaangot sa pila ka Facebook posts ni Mr. Jose Nereo Lujan apang wala man nakasaad kun ano nga mga post ang ila ginatumod.
Suno sa SK, nagapakita ang posts ni Lujan sang “hostility” sa syudad sang Iloilo nga ginalantaw suno sa grupo nga potensyal nga makahatag sang pagpang-duha-duha kag pagbinahin-bahin sang constituents.
Nauna na nga ginpahayag nga ang fact-finding committee amo ang maka-rekomendar para sa dismissal sang complaint bangud sa kakulang sang ebidensya, ukon mahimo man magrekomendar para sa filing sang formal administrative charges batok kay Lujan.#
