Ginklaro ni Ombudsman Jesus Crispin “Boying” Remulla nga nagapabilin nga mapag-on ang kaso nga plunder nga gina-atubang ni anay House Speaker Martin Romualdez kaangot sa gina-alegar ₱7.4 bilyon nga korupsyon sini sa gobyerno.
Suno kay Remulla, wala nagakahulugan nga naghina ang kaso batok kay Romualdez bangud lamang sa nangin pahayag sang isa ka testigo halin sa Anti-Money Laundering Council (AMLC) sa ginpatigayon nga hearing.
Nagalaom naman ang Office of the Ombudsman sa iban pa nga testigo kag ebidensya nga pwede nga ipaatubang agud nga suportahan ang kaso nga ginpasaka batok sa anay lider sang Kamara.
Sa hearing kaangot sa aplikasyon para sa piyansa sa kaso nga plunder, ginpresentar sang isa ka tinawo sang AMLC nga may kabug-usan nga 560 milyon pesos nga nagsulod sa bank account ni Romualdez sadtong siya pa ang nagapungko bilang House Speaker.
Kaangot sini, importante nga klaruhon suno sa AMLC ini nga alegasyon bangud wala sila sang ebidensya nga nagpasulod sang kwarta sa mga account ni Romualdez nga naghalin sa mga illegal nga aktibidad ukon direkta nga naghalin sa mga flood control project.
Bangud sini, nangin importante nga kagbahin sang hearing ang paghibalo kun sa diin gid man naghalin ang mga nasambit nga kwarta kag kun may kaangtanan bala ini sa mga alegasyon sa korupsyon.
