Padayon nga nagahatag inspirasyon ang isa ka dedikado nga blood donor nga sa sulod sang pila ka tuig, wala nagabag-o ang desisyon sini tuhoy sa pagdonar sang dugo bangud luyag niya nga makabulig sa mga indibidwal nga nagakinahanglan sang dugo.
Sa interview sang Bombo Radyo kay Marlou Aspiracion, 56 anyos, residente sang Sto. Domingo, Arevalo, Iloilo City, kag first successful blood donor sang Bombo Radyo Iloilo sa Dugong Bombo 2026, iya ginpahayag nga iya adbokasiya ang kada tuig nga pag-donar sang dugo kun sa diin nangin first successful blood donor man ini sang nagligad nga tuig.
Suno sa iya, halos isa na ka dekada man siya nga padayon nga nagarekord sang sunod-sunod nga madinalag-on nga pagdonar sang dugo, nga nagapakita sang iya katutom kag pagpalangga sa iya isigkatawo.
Para kay Aspiracion, ang pagdonar sang dugo indi lamang isa ka simple nga donasyon, kundi isa ka paagi agud makahatag sang paglaum kag makabulig sa pagluwas sang kabuhi sang iban.
Ang Dugong Bombo isa ka proyekto sang Bombo Radyo Philippines, sa pagbinuligay sang Bombo Radyo Phils. Foundation, Inc. kag Philippine Red Cross, nga may katuyuan nga mapalapnag ang importansya sang boluntaryo nga pagdonar sang dugo kag pagluwas sang kabuhi.
