Nagdepensa naman ang Philippine National Police (PNP) angut sa pag-aresto sa masobra 300 ka mga raliyista sa tunga sang 49th Association of Southeast Asian Nations (ASEAN) Summit.
Suno kay PNP Public Information Office chief Police Brigadier General Allen Rae Co, nagpatuman ang kapulisan sang maximum tolerance sa pag-atubang sa mga nagprotesta.
Pahayag pa niya nga wala kinaandan sang mga pulis ang pagdakop sang mga tawo nga wala sang rason kag ginpanginwala ang paggamit sang kalakasan, amo man ang pag-aresto sa mga menor de edad.
Nahibaluan nga gin-aresto ang mga raliyista bangud sa ginapahayag nga pagsulod sang iban sa restricted areas kag mga komosyon nga natabo sa tunga sang mga nagprotesta kag kapulisan.
Ginpahayag man sang ahensya nga ipaidalom sa inquest proceedings ang mga gin-aresto agud mahibaluan kun ano nga kaso ang mahimo nga ipasaka batok sa ila.
Dugang pa ni PBGEN Co, ginpahanumdom sang PNP ang publiko nga magsunod sa layi kag indi maghimo sang bisan ano nga makagamo sa seguridad nga ginapatuman para sa ASEAN Summit.














