Nagpanawagan si Senator Francis Kiko Pangilinan sa Philippine National Police (PNP) nga ipatuman ang maximum tolerance kag respetuhon ang kinamatarung sang mga Pilipino nga maghiwat sang malinong nga protesta sa tunga sang Association of Southeast Asian Nations (ASEAN) Summit.
Ginpabug-atan sang senador nga importante nga mapabilin ang seguridad kag kalinong samtang ginapasiguro nga naprotektahan ang kinamatarong sang mga Pilipino nga magpabutyag sang ila opinyon.
Suno kay Pangilinan, pareho lang nga mga Pilipino ang mga pulis kag mga nagaprotesta nga nagahandum sang mas maayo nga pangabuhi, hilway kag luwas nga komunidad kag maayo nga palaabuton para sa ila pamilya.
Bangud sini, ginpangabay niya ang mga pulis nga atubangon ang mga nagaprotesta nga may paghangop kag respeto.
Dugang pa sang senador, wala sang rason nga ikahuya ang malinong nga protesta bisan pa nga nag-abot sa Pilipinas ang mga lider kag delegado halin sa nagkalain-lain nga pungsod para sa ASEAN Summit.
Sa baylo, isa ini ka kahigayunan nga mapakita sa international community nga kabahin sang demokrasya sa Pilipinas ang kahilwayan sa pagpabutyag sang opinyon kag pagrespeto sa nagkalain-lain nga panan-aw.
Ginpanindugan ni Pangilinan nga dapat masiguro ang kaluwasan sang tanan samtang ginahatagan sang kahigayunan ang mga Pilipino nga mapabati ang ila mga reklamo kag mga panindugan.














