Ginrepresentar ni Mayor Raisa Treñas ang Iloilo City sa ASEAN Governors and Mayors Forum (AGMF) 2026 kag Meeting of Governors and Mayors of ASEAN Capitals (MGMAC) sa Manila.

Ini nga forum nagahatag kahigayunan sa mga local government leaders sa Southeast Asia nga ma-istoryahan ang mga solusyon sa nagkalain-lain nga urban challenges.

Sa iya mensahe, ginpahayag ni Treñas nga isa ini ka oportunidad para sa mga lider sang nagkalain-lain nga siyudad sa ASEAN nga magpaambit sang eksperyensya, best practices kag mga solusyon, ilabi na sa climate resilience, sustainable urban development, digital transformation kag inclusive economic growth.

Suno kay Treñas, madamo sang mahimo matun-an ang Iloilo City halin sa mga eksperyensya sang iban nga ASEAN cities, nga mahimo ma-adopt sa local level.

Handa man ang siyudad nga ipaambit ang ila mga inisyatibo kag eksperyensya sa padayon nga pagtinguha nga mangin mas resilient, progressive kag inclusive ang Iloilo City.

Ginalauman nga paagi sa forum, mapalig-on ang mga partnership kag matukiban ang dugang nga oportunidad nga mahimo magresulta sa mas maayo nga programa kag serbisyo para sa mga Ilonggo.

Samtang, imbitado man sa nasambit nga forum si Iloilo City Vice Mayor Lady Julie Grace Baronda kung sa diin ginapaabot man niya nga paagi sa pag-host sang Pilipinas sa forum, mas mapakilala sa international community ang mga tourist spots sang pungsod kag maka-attract sang dugang nga mga turista.

Text 𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬