Nagdugang ang Janiuay sa lista sang mga kabanwahanan nga luyag man madeklarar bilang capital town sang probinsya sang Iloilo.
Ini matapos gin-aprubahan sang Nobyembre 9, 2026 ang resolusyon sang Sangguniang Bayan nga nagapangabay sa Provincial Government of Iloilo, paagi sa Sangguniang Panlalawigan, nga ihatag sa ila ang amo nga pagkilala.
Sa interview sang Bombo Radyo kay Jemar Alerta, Secretary sa Sangguniang Bayan, iya ginpahayag nga isa sa mga rason nga ila ginbutang sa resolusyon amo nga nangin first class municipality sa sulod sang halos duha na ka dekada ang banwa bangud sang populasyon kag ekonomiya.
Iya man ginpahayag nga isa sa nangin bugal sang banwa amo ang turismo kun sa diin lakip ang mga old church ruin, Spanish colonial-era cemetery chapel, kag ang old Japanese Watch Tower.
Gintalupangod man ang estratehiko nga lokasyon sang Janiuay sa tunga nga bahin sang Iloilo nga nagahatag sang mas mahapos nga pagbiyahe pakadto sa coastal areas kag sa mga lugar nga yara sa sulod sang probinsya.
Suno sa resolusyon, makabulig ini sa mas mahapos nga pagdumala kag paghatag sang serbisyo publiko.
Ginbutang man sa resolusyon ang kontribusyon sang Janiuay sa ekonomiya sang probinsya paagi sa agrikultura kag negosyo, kag may produkto man nga mga kilala nga lider, propesyonal, kag mga alagad sang gobyerno nga naghalin sa banwa.
Dugang pa niya nga ang ila konseho nagsunod sa proper channeling sang resolusyon nga ipadala ini sa Sangguniang Panlalawigan nga amo ang magdesisyon kun i-refer ini sa nagakaigu nga committee ukon irekomendar sa higher congress.
Nahibaluan nga antes ang Janiuay, nagpabutyag man ang mga banwa sang Cabatuan, Oton, kag Sta. Barbara nga luyag man makilala bilang capital town sang Iloilo Province.














