Ginapaabot nga mas madamo pa ang madakpan nga mga illegal operators kag colorum nga mga salakyan sa palaabuton nga paskwa bangud sa pagpangunyadi sang mga drivers.

Ang nasambit nga mga operators amo ang mga nagabiyahe nga wala sang nagakaangay nga prankisa ukon rehistro.

Base sa datos sang Land Transportation Office 6, naglab-ot na sa 299 ka colorum nga salakyan ang ila na-apprehend kag na-impound halin Enero tubtob subong nga bulan sa subong nga tuig.

Sa interview sang Bombo Radyo kay Atty. Gaudioso Geduspan II, Regional Director sang LTO 6, wala sang lugar ang mga illegal operators sa transport industry kag indi pag-untatan ang pagpangdakop kun sila magapadayon.

Pahayag man ni Geduspan nga paagi sa pagprotekta sang mga legal operators, maprotektahan man nila ang mga pasahero.

Dugang pa niya, kun mahimo nga madakpan, posible ma-impound ang salakyan kag pabayron sang multa ang ila pagaatubangon.