Indi kinahanglan nga magpakita sang personal ni Senator Ronald ‘Bato’ dela Rosa sa Senado apang kinahanglan niya nga manumpa sa atubang sang notaryo publiko para sa iya nga responsive pleading.
Ini kasunod sang pag-issue sa iya sang Senate Committee on Ethics and Privilege sang subpoena kun sa diin kinahanglan niya nga magsabat sa sulod sang 15 ka adlaw.
Ang reklamo natuhoy sa malawig sini nga pag-absent sa official Senate duties amo ang ginduso sang grupo nga “Wag Kang KuCorrupt” movement sang Pebrero 25, 2026 nga ginapangunahan nanday Atty. Barry Gutierrez kag UP Professor kag Former Finance USec. Cielo Magno.
Sa interview sang Bombo Radyo kay Atty. Jeremy Moreno, Law Professor sang University of San Agustin College of Law, iya ginpaathag nga amo ini ang ginapatuman nga pagsulundan sang komitiba.
Iya man ginpahayag nga ang required nga pagahimuon ni Sen. dela Rosa amo ang mag-file sang iya nga responsive pleading sa gin-file man nga complaint.
Dugang pa niya, ang response nga gina-require sa pugante nga senador dapat ‘under-oath’ ukon kinahanglan niya nga manumpa sa atubang sang notaryo publiko.
Madumduman nga anum na ka bulan nga wala nagapakita si dela Rosa sa publiko pagkatapos ang “shooting” sa sulod sang Senado sang Mayo 13.
Ini ang kasunod sang eksena nga paglagsanay sang Mayo 11 matapos nga gintinguhaan siya nga arestuhon sang mga ahente sang National Bureau of Investigation (NBI).
Nahibaluan nga gindagdagan sang International Criminal Court (ICC) si Dela Rosa sang arrest warrant kaangot sa crimes against humanity case nga ginapangatubang man ni former President Rodrigo Duterte kasunod sang implementasyon sang maduguon kag kontrobersyal nga drug war.














