Gin-prangka sang China ang Pilipinas nga dapat ini maghalong sa mga tikang sa ginaagawan nga teritoryo bangud nga nagapangatubang na subong sang seryoso nga mga pagpanghangkat ang relasyon sang duha ka nasyon.
Ginpalab-ot ini ni Chinese Foreign Minister Wang Yi kay Department of Foreign Affairs (DFA) Secretary Enrique Manalo sa ila pag-istoryahanay sa telepono kasunod sang asud-asud nga tensyon sa West Philippine Sea.
Sa report sang Chinese media nga gin-share man ni Chinese Ambassador Huang Xilian, nakasaad nga ginabasol ni Wang ang Pilipinas bangud sa pag-ilis sang mga polisa sini.
Ginmuno man sang China ang pagguba sang Pilipinas sang promisa sini kag ang padayon sini nga pagpang-garit-garit paagi sa pagpakanubo sang lehitimo nga kinamatarong sang Beijing sa West Philippine Sea.
“China-Philippines relations are at a crossroads. Faced with the choice of where to go, the Philippines must act with caution,” kabahin sang readout.
Nagpaandam pa si Wang nga kun padayon ini nga mga tikang sang Pilipinas, depensahan man sang China ang ila nga kinamatarong sandig sa layi kag indi sila mag-alang-alang nga mag-responde sa mga lihok sang Manila.
“Proper management of current maritime situation serves as top priority. Hope this candid exchange of views will help manage maritime situation and improve bilateral relations.”
Dapat man suno kay Wang nga magbalik na ang Pilipinas sa husto nga banas sa labing-madali nga tion samtang nga gina-kay-o man ang pag-manage sang sitwasyon sa West Philippine Sea.
Nagpaguwa man sang statement ang DFA kasunod sang pag-istoryahanay sang duha ka opisyal: “We had a frank and candid exchange and ended our call with a clearer understanding of our respective positions on a number of issues. We both noted the importance of dialogue in addressing these issues.”
