ILOILO CITY – Gina-umpisahan na sang Ad hoc Committee ang pagbalay sang framework kag guidelines may kaangtanan sa ginaduso nga amat-amat nga pagdula sang Enhanced Community quarantine sa syudad sang Iloilo.
Sa interview sang Bombo Radyo kay Iloilo City Councilor Alan Zaldivar, chairman sang Committee on Health, iya ginpahayag nga ang lifting sang Enhanced Community Quarantine ang step by step nga ipatuman.
Suno kay Zaldivar, una nga ipatuman ang Phase 1 tubtub sa pinakamataas kag ang kada Phase ang may yara sang nagkalain-lain nga guidelines.
Ginpahayag ni Zaldivar nga sa amat-amat, mabalik sa kinaandan ang sitwasyon sa syudad sang Iloilo.
Ginaduso naman ni Iloilo City Councilor Love-Love Baronda, chairman sang Committee on Social Services and Disaster Reduction, Information Technology kag Education, nga magpatigayon sang psychosocial support services.
Suno kay Baronda, tion na para sa istitutionalization sang mental health groups agud nga makabulig sa mga nakabatyag sang emotional fatigue.
Magluwas diri, ginaduso man ni Baronda ang pagpangita sang solusyon kun paano mangin Information Technology ready ang tagsa ka institusyon sa syudad sang Iloilo kag kun paano maplastar ang pagpadayon sang klase.
Ginpahayag ni Baronda nga liwat nga magasapol ang Ad hoc Committee agud nga lubos na nga maplastar ang guidelines.
