ILOILO CITY – Nagaplano ang Asian Development Bank nga magpahulam sang ginabanta $4 billion ukon P221 billion sa Pilipinas subong nga tuig agud nga mabuligan ang pungsod nga mag-develop sang infrastructure kag mapasanyog ang climate adaptation.
Kadungan sang pagbukas sang 56th Annual Meeting sa Incheon, South Korea, ginpahayag ni Kelly Bird, ang Philippine Country Director sang Asian Development Bank nga lakip sa mga major infrastructure projects nga ginalantaw nga gastuhan subong nga tuig amo ang Bataan-Cavite Bridge, kag ang Davao Public Transport Modernization Project.
Sa sulod sang duha tubtob tatlo ka tuig, nagaplano man ang bangko nga pondohan ang Laguna Lakeshore Expressway kag ang MRT-4.
Humalin sang 2019, ginpahayag ni Bird nga ang Asian Development Bank ang nagapahulam sa Pilipinas sang ginabanta $3 billion kada tuig ukon P166. 2 billion kun sa diin, ang 60 percent sini ang nagakadto sa infrastructure.
