ILOILO CITY- Nag-testify batok kay anay President Donald Trump ang adult film star nga si Stormy Daniels sa criminal trial sang anay president sa New York.
Sa amo nga trial, ginbuyagyag ni Daniels ang ginaalegar sexual encounter sini kay Trump halos 20 ka tuig na ang nakaligad kag kun ngaa ginbaton niya ang $130,000 kabaylo sang iya paghipos sang 2016.
Ginsaysay ni Daniels nga nagkitaay sila ni Trump sa isa ka celebrity golf tournament sa Nevada sang 2006 kun sa diin gin- imbitar siya ni Trump sa iya hotel suite kun sa diin sila nag- istorya kag nagpakighilawas.
Suno sa iya, pagkasunod nga tuig, gin-istoryahan nila ni Trump ang possible pagpasulod sa reality show ni Trump.
Naghingyo naman ang abogado ni Trump sa huwes nga magdeklarar sang mistrial kasunod sang iya testimonya ni Daniels bangud suno sa kampo ni Trump, ang elemento sang testimoniya ang wala sang labot sa kaso.
Gilayon naman nga ginbasura sang judge ang request.
Sang October 2016, nagpasugot si Daniels nga indi pagsapubliko ang iya istorya kabaylo sang $130,000 naggikan kay Michael Cohen, ang personal attorney ni Trump sang amo nga tion.
Nagbayad si Cohen pila ka adlaw antes ang presidential election.
Si Cohen ang nagabaton naman sang monthly payments halin kay Trump nga $35,000 sa bilog nga 2017.
Suno sa prosecutors, ang amo nga payments ang reimbursements para sa “hush money”.
Si Trump ang ginkasuhan sang 34 counts sang pagpeke sang business records nga nag-ugat sa reimbursements kay Cohen.
Ginapakigbato naman sang abogado ni Trump nga ang kwarta ang nag- cover sa legal fees kay Cohen.
Si Trump ang nag-plead nga not guilty sa tanan nga charges kag ginpanginwala nga nakighilawas ini kay Daniels.
