ILOILO CITY – Desidido ang isa ka amay nga ipapreso ang kaugalingon nga anak nga nagbuno sa iya sa Brgy. Lanit, Jaro, Iloilo City.
Ang biktima amo si Nicandro Josmil Sr., 63, samtang ang suspek naman amo si Ramil Josmil, 43, lunsay sang nasambit nga lugar.
Sa interview sang Bombo Radyo kay Rosalinda Josmil, 61, kag tiayon sang biktima, iya ginpahayag nga hubog nga nagpauli sa ila balay kag hinali lang nga nagpalagapok sang sin nga plantsa ang anak nga si Ramil.
Nagakatulog na sang amo nga tion ang iya bana nga si Nicandro kag nakibot sa ginhimu nga pag-eskandalo sang ila anak.
Ginhangkat ni Ramil ang iya amay nga mag-away tubtub nga nabun-an ang biktima gamit ang magamay kag tuktukon nga patalum.
Ginpahayag sang iloy nga sadto, nagapati gilayon si Ramil kun sawayon sa tion nga mahubog.
Ini ang labing ina nga kahigayunan suno kay Rosalinda nga kasubong nga daw halos indi sila kilala ni Ramil.
Sa subong, nagapabilin pa sa ospital ang biktima kag desidido nga ipapreso ang kaugalinon nga anak.
