Ginakonsider sang Oton Municipal Police Station nga person of interest ang amay matapos nasapwan-patay ang anak sini nga lalaki sa Brgy. Sta. Rita. Oton, Iloilo.
Ang biktima amo si Raymundo Sarad, Jr., 36-anyos, residente sang nasambit nga lugar.
Kaina sang aga sang nakit-an ini nga yara na sa kanal kag may pilas nga tuga sang pagkabuno sa iya nga wala nga butkon kag wala nga paa.
Sa interview sang Bombo Radyo kay Police Captain Lunelyn Talamillo, deputy chief of police sang Oton Municipal Police Station, iya ginpahayag nga nakita nga may dugo ang tiil sang amay, may hanog ang mata kag nakuha man sa iya posisyon ang kutsilyo nga may dugo.
Magluwas diri, sang gin-check ini sa ila nga balay, nakit-an man nga may mantsa sang dugo ang bed sheet kag ang ulunan sa hiligdaan sang biktima.
Lunsay nakainom kagab-i ang mag-amay kag ginaalegar nga may mga kasilingan nga nakabati sang ila pagbaisay kagab-i.
Yara na sa kustodiya sang pulis ang amay kasunod sang insidente. Pahayag sang PNP, nagkuha naman sila sang sample sang blood stain agud nga ma-check kun naga-santo ini sa dugo sang biktima.
‘NAKABUNGGO LANG’
Kun basehan ang bersyon sang istorya sang amay nga si Raymundo Sarad, Sr., iya ginpahayag nga magkaupod sila sang iya anak nga nag-inom sa balay ni Alyas Bunis kon sa diin nagalahuganay pa sila sa amo nga tion.
Suno sa amay, manog alas-dose sang kagab-ihon sang nag-una siya nga nagpauli sa ila balay.
Ginpahayag man sini nga nakibot na lamang siya sang ginpukaw siya sa ila balay agud ipahibalo nga nasapwan ang iya anak sa kanal kaina sang aga.
Nagdepensa man ang amay nga nakabunggo lamang siya rason nga may black eye. Nagpanginwala ini nga ginsumbag siya sang iya anak.
Ginpahayag man ni Sarad nga apisar lunsay nga hubog sila sang iya anak kagab-i, wala sila nakabaisay.
‘PIRME NAGABAISAY KUN HUBOG’
Gintuad naman sang utod sang biktima nga masami gid man nagabaisay si Junior kag ang ila amay kun mahubog.
Sa interview sang Bombo Radyo kay Sheila Mae Suarez, iya ginpahayag nga istorya-hinubog lang ang gina-awayan sang iya amay kag utod, apang masami nga naga-ayuhay man kun maumpawan.
Suno naman kay Punong Barangay Danilo Villacastin, mismo ang bata ang naga-istorya sa iya nga nagapuis sila sang iya amay, kag nakapanugid man ang amay bangud mag-abyan man sila sini.
Gindugang sang barangay official nga wala sang blotter report kag wala man nakaagi nga nagresponde ang barangay bangud daw nahimo na lang nga normal ang ila masami nga pagbaisay.#
