100% nga sigurado ang amay sang 13-anyos nga solterito sa Barangay Casalsagan, Pototan, Iloilo nga kilala gid sang iya anak ang suspek nga amo ang nagmartilyo sa iya ulo kag nangin rason sang kamatayon sini.
Sa interview sang Bombo Radyo kay Raul Pachejo, iya ginpahayag nga imposible man nga patyon gid ang iya bata kun mangawat lang ang tuyo kag suspek kag kun indi man ini makilal-an.
Kun balik-balikan ang insidente sang Marso 29, ginapahayag nga naabtan ni Pachejo ang anak nga nagahuray-ad sa kusina, duguon, may martilyo sa iya nga tupad, kag may yara pa sang agi sang kuko sa liog nga posible tuga sang pagka-kuga.
Sa interview sang Bombo Radyo kay Pachejo, iya ginpahayag nga bantay lang kag hampang sa computer shop ang opisyo sang iya nga anak, kag wala man ini sang nakontra sa amo nga lugar.
Antes sini, ginapahayag nga naka-report na sa barangay si Pachejo nga pila ka beses nga may nagpangawat sa computer shop, kag ini ang isa sa ginapatihan nga rason nga naangot man sa insidente.
May ginatan-aw naman si Pachejo nga amo ang suspek, apang ginalikawan niya nga ipahayag ini sa publiko myentras wala sang ebidensya kag myentras huring-huring pa lang ang basehan.
Indi man mahangpan sang amay kun ngaa wala gid sang may nakatalupangod sa mga bata sa computer shop sang tion nga ginhimo sang suspek ang krimen.
Nahibaluan nga ang solterito na lang kag si Pachejo ang magkaupod nga nagapangabuhi sa amo nga puluy-an.
