ILOILO – Dakop sa ginpatigayon nga drug buybust operation sa Hibao-an Norte, Pavia, Iloilo ang menor de edad nga nobya sang anay OFW nga nadakpan man sa buybust operation sa Molo kaina nga aga kag nagapahayag gin-abduct sang mga armado nga lalaki kag nagpakilala nga pulis.
Nakuha sa iya nga posisyon ang 25 ka sachet sang suspected shaby kag duha pa nga 18 ka plastic sachet sang ginapahayag ilegal nga droga nga nagabalor P75,000.
Nahibaluan nga una na nga nagpahayag ang OFW nga si Alyas Jom, 36 anyos nga gin-abduct siya sang mga armado nga lalaki nga nagpakilala pulis sa diin ginpaako siya kun diin sya nagakuha sang ilegal nga droga.
Suno kay Alyas Jom, ginpilit siya nga ginpasakay sa isa ka pick up sa diin ginkuga siya kag ginsakit samtang ginapaako kun diin siya nagakuha sang supply sang ilegal nga droga.
Samtang hugot naman nga ginpanginwala sang amay ni Alyas Jom nga may kaangtanan ang iya nga bata sa ilegal nga droga.
Sa interview sang Bombo Radyo kay Joelito Sabio, amay ni Alyas Jom iya ginpahayag nga wala sang kaangtanan sa ilegal nga droga nga iya nga bata bangud sa pagkamatuod bag-o lang ini nakapanaog sa barko kag wala sang koneksyon sa sinuman nga nagapatigayon sang ilegal nga butang.
Suno kay Sabio, base sa panaysayon ni Alyas Jom, ginpilit siya nga pasakyon sa isa ka pick up samtang sa van naman ang iya nga nobya sa diin ginlibot siya sa syudad samtang ginapaako ku diin siya nagakuha sang supply sang ilegal nga droga.
Gin ako naman sang natungdan nga una na nga nabuy bust ang iya nga bata sang 2016 apang naabswelto ini.
Sa subong, luyag sang amay sang biktima nga mahatagan sang hustisya ang natabo sa iya nga bata bangud nagapati siya nga wala ini sang kaangtanan sa ilegal nga droga.
