POTOTAN, ILOILO – ‘Maayo gid kuntani ang motibo’ sang 20 anyos nga driver sang truck sa paglikaw sa Sports Utility Vehicle (SUV) sa dalan sa Barangay Amamaros, Pototan, Iloilo apang ‘posible nataranta’ kag nagresulta sa kamatayon sang duha ka tawo.
Ini ang santo sa pahayag sang pahinante nga nakasakay sa truck kag sa nangin dalagan sang imbestigasyon sang pulis.
Ang driver sang ginatumod nga truck amo si Regent Albacete, residente sang Hibao-an Sur, Mandurriao, Iloilo City.
Patay sa amo nga aksidente kaina sang hapon ang mag-asawa nga sakay sang SUV nga sanday Emil kag Merren Pagtolon-an, lunsay 36 anyos, residente sang Barangay Bagacay, Passi City.
Sa interview sang Bombo Radyo kay Police Staff Sergeant Raffy Gonzales, traffic investigator sang Pototan Municipal Police Station, iya ginpahayag nga halin sa Iloilo City kag padulong na sa Passi City ang direksyon sang SUV samtang halin naman sa Passi City kag padulong sa Iloilo City ang direksyon sang ten-wheeler truck.
Suno kay Gonzales, sang yara na sa Barangay Amamaros sa Pototan, nag-overtake ang SUV sang mag-asawa sa isa ka salakyan apang naalang-alangan ini bangud gulpi lang nasumalang ang truck.
Suno kay Gonzales, naglikaw si Albacete kag ginwarik ang truck padulong sa lane nga iya gid sang SUV (sa wala), apang naglikaw man ang SUV kag nagbalik liwat sa iya gid nga lane rason nga naglab-utanay gid ang duha ka salakyan kag natabo ang head-on collision.
Ginapahayag nga maayo man kuntani ang intensyon sang truck driver sa paglikaw apang posible nga nataranta lang rason nga natabo ang head-on collision kag ‘almost totally-wrecked’ gid SUV kag wasak man ang nauna nga bahin sang truck.
SUNO SA PAHINANTE NGA KAUPOD SANG DRIVER SA TRUCK
Mahinay kag matawhay ang dalagan sang truck.
Ini naman ang depensa ni Joery Teves, ang pahinante nga kaupod sang driver sang ten-wheeler truck.
Sa interview sang Bombo Radyo kay Teves, iya ginpahayag nga ‘gulpi’ lang naghalin sa iya nga lane ang SUV bangud nag-overtake ini sa wing van.
Sang nakita sang driver sang truck nga masugataay sila sang SUV, ginwarik sini ang truck padulong sa wala nga lane (lane sang SUV),
bangud kun sa tuo [nga lane] sini iwarik ang ginamaneho nga truck, mabungguan sini ang isa ka motorsiklo nga may angkas pa nga isa ka bata.
Ini ang ginapatihan ni Teves kun ngaa ginpili sang driver nga sa wala [nga direksyon] ginkabig ang truck apang didto man nagbalik ang SUV rason nga natabo ang aksidente.
Ginpahayag nga nakaangkon man sang samad sa lawas ang driver sang truck gani gindala man ini sa ospital.
Natalana pa nga mag-istorya ang pamilya sang mga biktima sa mga pulis may kaangtanan sa mangin dalagan sang kaso. #
