Gin-anunsyo sang Department of Migrant Workers (DMW) nga hilway na sa katalagman ang apat ka Pinoy seafarers nga lakip sa nasamaran sang gin-igu sang missile sang Russia ang ila ginasakyan nga barko sa Ukraine.
Suno kay DMW officer-in-charge Undersecretary Hans Leo Cacdac, yara ang apat ka Filipinos sa bridge sang Liberian-flagged ship nga Kmax Ruler sa port sang Pivdennyi malapit sa Odesa, Ukraine sang nag-igu ang missile sa vessel.
Photo: Maritime Bulletin
Indi tuman ka patal nga mga pilas ang ila naangkon suno kay Cacdac kag subong safe na ang ila nga sitwasyon. Lakip sa ginatumod nga apat ka Fiipinos amo ang kapitan sang barko, isa ka able seaman, isa ka deck cadet, kag isa ka electrician.
Magluwas sa Filipino seafarers, may pilason man nga port employee kag may isa nga napatay nga Ukrainian pilot.
“The Filipino captain, able seaman and deck cadet suffered minor injuries and are receiving treatment on-board. The ship’s electrician, meanwhile, sustained a fracture on his left hand and is receiving treatment at a local hospital,” suno kay Cacdac.
Nagmandu man ang DMW sa manning agency sang seafarers amo man sa tag-iya sang barko nga maghatag sang nagakaigu nga assistance sa injured nga mga crew.
Gin-facilitate man sang ahensya ang komunikasyon sa tunga sang seafarers kag sang ila pamilya agud mapahamtang ang ila buot kaangot sa ila nga kondisyon.
Una na nga ginpahayag sang military command sang Ukraine nga pasulod kuntani ang barko sa pantalan sang Black Sea region sang Odesa sang nagtupa ang ant-radar missile nga ginpalupad sang Russian tactical aircraft sa Black Sea. #
