Gin-report sang climate monitor sa European Union nga ang bulan sang Abril ang nagmarka sang record-breaking nga global air kag sea surface temperature averages kag amo ang nangin pinakamainit nga Abril sa maragtas.
Ini nga abnormal nga kainit ang natabo apisar pa sang amat-amat naman nga paghina sang El Nino weather phenomenon suno sa ginbalhag nga report sang Copernicus Climate Change Service.
Pahayag pa sang Copernicus, halin sang Hunyo sang nagligad nga tuig, ang kada bulan amo ang ginakabig nga pinaka-mainit nga period sa record.
Natabo man ini sang Abril nga nakapagkit sang 1.58 degrees Celsius nga mas mataas sa 1850-1900 pre-industrial average.
“The extra energy trapped into the ocean and the atmosphere by increasing concentrations of greenhouse gases will keep pushing the global temperature towards new records,” suno sa statement ni Copernicus director Carlo Buontempo.
Nahibaluan nga bilog nga kalibutan ang nagbatyag sang tuman nga epekto sang climate change sang Abril kun sa diin sa mga parte sang South kag Southeast Asia — halin sa Bangladesh pakadto sa Vietnam — natabo ang heatwaves; samtang sa southern Brazil, United Arab Emirates, kag East African countries nga Kenya kag Tanzania ang naka-eksperyensya naman ang tumalagsahon nga baha bangud sa mabaskog nga pag-ulan.#
