Ginpat-od sang alkalde sang Balasan, Iloilo nga preparado ang ila nga banwa sa mangin halit nga dala ni bagyo Dante.
Sa interview sang Bombo Radyo kay Balasan, Iloilo Mayor Manuel Ganzon, iya ginpahayag nga apisar ginbaha ang madamo nga manubo nga lugar sa ila nga banwa, gilayon nga gin-evacuate ang mga pamilya nga apektado.
Suno kay Ganzon, abtik man ang pagbululigay sang mga barangay officials sa diin nagpanatag ini sang mga pagkaon kag pamahaw sa mga pumuluyo nga ginpang-evacuate.
Ginpahayag sang alkalde, nga ginalantaw nga ang gintunaan sang lapnagon nga pagbaha sa ila nga lugar amo ang mamunog nga pag-ulan, umpisa sang nagligad nga gab-i tubtob sang las 6:00 sang kaagahon.
Samtang, suno naman sa Municipal Disaster and Risk Reduction Management Office (MDRRMO) sang Balasan, Iloilo, as of 1:00 pm, naglab-ot sa 169 ka pamilya sa diin katumbas sini ang 527 ka mga indibidwal nga mga ginpang-evacuate sa Balasan Civic Center.
Sa interview sang Bombo Radyo kay Chinky Diolosa, head sang MDRRMO sang nasambit nga banwa, iya ginpahayag nga ang 169 ka mga pamilya ang nagikan sa mga masunod nga barangay:
- 49 ka pamilya sa Poblacion Sur;
- 13 pamilya sa Poblacion Norte;
- 4 pamilya sa Brgy. Maya;
- 41pamilya sa Brgy.Mamhut Sur;
- 15 pamilya sa Brgy. Kinalkalan;
- 6 pamilya sa Barangay Cabalic; kag
- 41 pamilya sa Brgy. Mamhut Norte
Suno kay Diolosa, sa subong, amat-amat na nga nagsubside ukon nagtahaw ang tubig baha sa diin ang iban sa mga pumuluyo nga gin-evacuate ang nag-amat-amat na balik sa ila nga mga balay.
Ginpahayag sang natungdan nga bangud nakapatigayon sila sang pre-disaster risk analysis sa ila nga mga pumuluyo antes naglaslas ang bagyo Dante, gilayon nga nakahanda ang mga tawo sa pag-evacuate sa diin wala man sila sang may narekord nga casualties kag mga napilasan.
Sa subong, ginlift na ang signal number 2 sa banwa sang Balasan, Iloilo.
