Arestado sa operasyon sang Criminal Investigation and Detection Group – Iloilo City Field Unit ang babaye nga nagabaligya sang pornographic materials sa Valeria St., Iloilo City.
Ang gindakop amo si Teonabel Anacan. Naaktuhan sang otoridad nga nagabaligya sang X-rated nga DVDs si Anacan.
Sa interview sang Bombo Radyo kay Police Major Jess Baylon, hepe sang CIDG – Iloilo City Field Unit, iya ginpahayag nga sang nagpakilala nga pulis ang mga operatiba sa amo nga lugar, nagtinguha pa si Anacan nga taguon ang iya identity paagi sa pagpakuno-kuno nga isa ka Muslim.
Ginapahayag nga nag-suksok pa si Anacan sang hijab, ang religious veil nga ginasuksok sang mga babaye nga Muslim, apang sang gin-usisa sang mga pulis, indi ini makasugid sang iya nga tribu kag ‘indi man pang-Muslim ang pangalan’ suno kay Baylon.
Nagreklamo man ang mga Muslim sa lugar nga ginpatigayunan sang operasyon bangud ginapahayag ‘ginbaboy’ ni Anacan ang ila nga religious veil. Yara na subong si Anacan sa kustodiya sang Iloilo City Field Unit sang CIDG.
