Personal nga nagpadulong sa Bombo Radyo ang babayi nga amo ang ginatudlo sang isa ka gasoline station sa Barangay Tabuc Suba, Jaro, Iloilo City nga nagpatughong sang 120 ka litro sang gasolina apang 20 litro lang ang ginbayaran.
Kun balik-balikan ang una nga alegasyon sang cashier sang gasolinahan, ginpahayag nga may karga nga containers sa tricycle nga ginasakyan sang babayi kag sang lalaki sang nagligad nga Marso 12, didto ginbutang ang kabug-usan nga 120 litros sang gasolina, apang ginpahayag nga 20 ka litros lang ang ginbayaran sa cashier, kag gilayon nga naglakat ang tricycle kag ulihi na natalupangdan sang cashier sa point of sale (POS) system nga wala nagasanto ang volume sang gintughong sa balor nga ginbayaran.
Ini nga pahayag ang ginbali naman ni Lorena Suarez, residente sang Barangay Lupa, Santa Barbara, Iloilo.
Sa interview sang Bombo Radyo kay Suarez, iya ginpahayag nga 100 ka litro lang ang iya una nga ginpatughong, apang ginhatagan sini sang instruction ang gasoline boy nga dugangan sang 20 ka litro.
Suno kay Suarez, siya mismo ang nagpalapit sa cashier agud mag-settle sang iya nga balayran kag ginhambalan siya nga P1,330 lang ang iya nga balayran.
Nagdepensa si Suarez nga makapila ka beses niya nga ginsiling sa cashier nga 120 ka litros ang iya nga gintughong apang suno sa iya, gin-inister man sang cashier nga P1,330 lang ang iya nga dapat nga bayaran.
Ginapahayag wala man ginhatag sang cashier ang iya nga resibo gani nga naglakat na lang siya kag ang iya nga bana.
Nagpauli sanday Suarez apang suno sa iya, ginalauman na niya nga pangitaon siya ukon kadtuan sa ila nga balay bangud nakahibalo man siya nga may sala sa kalkulasyon, kag may CCTV sa amo nga gasolinahan kag posible gid nga matumod ang iya nga identity.
Nagsugtanay ang duha ka kampo nga bayaran na lang sang mag-asawa ang 120 litros nga ila gintughong.
