ILOILO – Ginmanduan ni Police Regional Office 6 Director Police Brigadier General Rene Pamuspusan ang bag-o nga Iloilo City Police Office Director nga solbaron ang kaso sang mga pagpatay sa Syudad sang Iloilo.
Ini ang ginpahayag ni Pamuspusan kadungan sang pormal na nga pagpungko ni Police Col. Eric Dampal bilang pinuno sang Iloilo City Police Office.
Sa interview sang Bombo Radyo kay Pamuspusan, iya ginpahayag nga isa sa mga dapat solbaron ni Dampal amo ang kaso sang pagpatay sa negosyante nga si Delfin Britanico nga ginluthang sang mga wala pa makilala nga suspek sa Nabitasan La Paz, Iloilo City.
Suno kay Pamuspusan, indi pa siya maghatag sang timeline kay Dampal sa pagsolbar sang kaso bangud bag-o pa lang ini nagpungko sa posisyon.
Gin-athag man ni Pamuspusan nga bangud sa media, mas na higlight ang kaso ni Britanico.
Apang suno sa natungdan, tanan nga mga kaso sang pagpatay ang ila man nga ginatinguhaan nga masolbar.
Sa subong suno kay Pamuspusan, ginatinguhaan na sang mga kapulisan nga mapadasig ang pagsolbar sa kaso ni Britanico.
Samtang, nangin malip-ot naman ang sabat ni Iloilo City Police Office Director Police Col. Eric Dampal sa nangin pagpanghangkat ni Police Regional Office 6 Director Police Brigadier General Rene Pamuspusan.
Sa interview sang Bombo Radyo kay Dampal, iya ginpahayag bilang bag-o nga pinuno sang Iloilo City Police Office, madamo pa siya sang mga dapat matun-an sa syudad.
Suno kay Dampal, tinguhaan siya nga padalman ang kaso sa bulig man sang Investigation Section sang Iloilo City Police Office.
Si Dampal, ang nagtal-os sa nabakante nga posisyon ni Police Col. Martin Defensor nga sa subong nagapungko na bilang Chief Regional Staff sa Police Regional Office 6.
