Nagahina na ang pwersa sang Bagyo Egay samtang nga yara ini sa Luzon Strait sa nakatundan sang Batanes.
Ulihi ini nga nasiplatan sa kalayuon nga 195 km nakatundan sang Basco, Batanes samtang dala ang kabaskugon sang hangin nga 150 km/h malapit sa sentro kag pagmadlos nga tubtub sa 185 km/h.
Nagahulag ini pa-naaminhan nakatundan sa kadasigon nga 15 km/h.
Ang mga lugar nga napaidalom sa tropical cyclone wind signal no. 2 amo ang mga masunod: Batanes, Cagayan lakip na ang Babuyan Islands, Apayao, Kalinga, Abra, Ilocos Norte, kag northern kag central portion sang Ilocos Sur.
Ang mga lugar naman nga napaidalom sa tropical cyclone wind signal no. 1 amo ang mga masunod: Isabela, Quirino, Nueva Vizcaya, Mountain Province, Ifugao, Benguet, nabilin nga bahin sang Ilocos Sur, La Union, Pangasinan, Aurora, Nueva Ecija, Tarlac, kag ang northern portion sang Zambales.
Ang Habagat ukon Southwest Monsoon nga ginpabaskog ni Egay ang magadala sang pag-ulan pati sa mga lugar nga wala sang ginpapanaog nga Wind Signal.
Gina-forecast nga maga-guwa si Egay sa Philippine Area of Responsibility subong nga aga ukon karon sa hapon. Posible ini nga maglandfall sa vicinity sang Fujian, China buwas sa aga.
Samtang, nagbaskog pa kag nahimo nga isa ka bagyo ukon Tropical Depression ang ginabantayan nga Low Pressure Area sa nasidlangan sang Mindanao.
Buot silingon sini, sa subong, duha ka bagyo ang yara sa sulod kag sa gwa sang Philippine Area of Responsibility.
Kun makasulod na sa Pilipinas ang panibag-o nga bagyo, pagatawgon ini nga Bagyo Falcon. #
