https://www.facebook.com/dyfmBOMBOILOILO/videos/1464366387052819/
ILOILO – Masubo kag masakit ang ginregalo ni Bagyo Ursula sa mga Ilonggo kadungan sang Christmas Day.
Sa Iloilo, tuman nga naapektuhan ang Northern Iloilo sa diin nagkalaguba ang mga balay, imprastraktura, indi man mapuslan ang mga pananum, madamu sang mga sapat ang nagkalamatay kag madamu man sang kabuhi ang nadula samtang may nagapabilin pa nga missing.
Nasaksihan mismo sang Bombo News Team nga ang iban sa kabanwahan sa Nothern Iloilo ang naapektuhan sang baha samtang ang iban naman ang naapektuhan sang tuman ka madlos nga hangin.
Sa baylo nga magpahuway ukon magkinasadya sa adlaw sang Paskwa, ang mga residente sa Northern Iloilo ang nagapakigbato agud nga makaluwas sa peligro.
Ang iban ang nagasaka sa atop ukon sa ika duha nga panalgan sang balay agud nga indi malab-ot sang tubig-baha samtang may iban naman nga wala nakasapar kag naanod sang nagadaludo nga tubig.
Indi maagyan ang mga mayor nga dalan matapos nga nagkalatumba ang mga kahoy kag poste rason nga wala sang supply sang kuryente.
Nangin daku naman nga pagpanghangkat para sa rescue teams ang kakulang sang equipment.
Pila ka adlaw ang nakaligad, padayon sa gihapon ang clearing operations kag power restoration sa 5th district.
Nagpalab-ot naman sang bulig ang Iloilo Provincial Government kag ginahulat ang kabug-usan nga report tuhoy sa halit nga gintuga sang bagyo.
Sa pihak sang mapait nga pagtilaw, pilit nga nagapakabakod kag nagatinguha nga makabangon ang mga Ilonggo.
