ILOILO – Nagalibog ang ulo ni Ajuy Mayor Jett Rojas kun paano nasulod sang mga ginapahayag armado nga mga lalaki ang ila balay sa Brgy. Central, Ajuy Iloilo.
Sa interview sang Bombo Radyo kay Mayor Rojas, iya ginpahayag nga makatilingala kun paano nasulod ang iya balay bangud may yara sang apat ka tawo nga nabilin diri antes siya magpadulong sa Manila.
Ini amo ang iya tatay, kabulig nga nagabantay sa iya tatay, nobyo sang kabulig kag ang tagdumala sang ila mga kasapatan.
Suno kay Rojas, base man sa pag-imbestiga sang mga otoridad wala tanda nga pwersahan nga ginsulod ang iya balay.
Nahibaluan nga natukiban sang mga otoridad nga wala na sang unod ang vault sang iya asawa nga may unod nga daan nga kwarta, singsing nga ginabanta nagabalor P2,000 kag isa ka relo.
Ginatan-aw subong nga posibilidad sang alkalde nga pamilyar ang nagsulod sa iya balay bangud nakahibalo ini kun sa diin nakabutang ang mga pagkabutang kag wala man sang tanda nga na-ukay ang iya mga gamit.
Sa subong, padayon na ang ginapatigayon nga imbestigasyon sa nagluntad nga insidente sa balay sang alkalde.
Santo sa pahayag sang natungdan, nagasalig siya mga kapulisan nga gilayon nga masolbar ang nasambit nga krimen.
