CHINA – Kun ikaw mahilig magpugong sang imo nga ihi sa kagab-ihon bangud tamad ka na magbangon, para gid ini sa imo.
Didto sa China, isa ka 40-anyos nga lalaki ang ginapahayag naglupok ang tatlo ka bahin sang iya apdo matapos nag-inom sang 10 ka botelya sang beer apang nagpugong man sang iya kaihion sa sulod sang 18 ka oras.
Santo sa testimoniya ni Mr. Hu sa Zhuji People’s Hospital sa Zhejiang, matapos nga nahubog siya sa iya gin-inom, nagdiretso na lang siya sa pagtulog kag wala na nagbangon-bangon pa.
Suno sa mga doktor, sang nagbugtaw na si Mr. Hu, may yara siya sang nabatyagan nga tuman nga pagpalanakit sang iya busong kag sang ginkarga na siya sa ambulansya, halos indi na siya makahigda kag makapungko.
Ginhanda ang emergency surgery kag isa ka team sang surgeons ang nagpaninguha nga maoperahan ang apdo ni Mr. Hu agud malikawan ang iban pa nga kumplikasyon.
Sa maayo nga palad, yara na subong sa estable nga kondisyon ang 40 anyos nga pasyente.
Nagpaandam naman ang mga doktor nga apisar malaka lang ang kaso kaangay sang natabo kay Mr Hu, mahimo ini matabo sa tanan nga mahilig magpugong sa ihi.
450 tubtob 500 millilitres lang ang limited capacity sang apdo gani regular gid nga magpangihi ilabi na kun madamo ka sang fluid intake.
