ILOILO – Hugot na nga ginapatuman sang banwa sang Janiuay ang mga lihok nga ila ginapatigayon agud makapangaman batok sa Coronavirus Disease 2019.
Ini matapos nga may nagpositibo sa nasambit nga balatian sa ila kaiping nga banwa nga amo ang Lambunao.
Sa interview sang Bombo Radyo kay Joven Barranco, pinuno sang Municipal Environment and Natural Resources Office sa nasambit nga banwa iya ginpahayag nga ginpasarado na nila ang borders kag tanan nga mga alagyan pasulod sa banwa sang Lambunao nga mahimo agyan sang mga tawo gikan sa nasambit nga lugar.
Suno kay Barranco, limitado lang sa highway ang mahimo maagyan agud mas mamonitor nila ang tanan nga naggwa kag nagasulod sa ila nga banwa.
Dugang sang natungdan, napatuman naman ang pagpanghatag sang Enhance Community Quarantine Pass sa mga pumuluyo.
Ginalauman naman nga maabot subong nga adlaw ang isa ka libo nga sako sang bugas nga igapanagtag sa 10,000 ka mga pamilya sa banwa bilang kabahin sang bulig sang Local Government sang Janiuay.
Ginahitso naman ang pagbakal nila sang mga kinahanglanon sang mga medical workers sa ospital sa diin pagagamiton nila ang P1 milyon nga pondo nga gikan sa Provincial Government.
Santo man sa pahayag ni Barranco, magasugod na sa biyernes ang pagpatuman sang bag-o nga scheduling sang ila nga merkado sa diin mahimo lang makabakal ang kada barangay sa ila schedule agud masunod man ang social distancing.
