Makaluluoy ang nadangatan sang isa ka pito ka tuig nga bata nga babaye matapos ginkuga kag ginhaboy sa sapa sa Brgy. Armado, Abra de Ilog, Occidental Mindoro.
Ang suspek amo 20-anyos nga live-in partner sang magulang sang biktima.
Antes nadiskubre ang natabo sa bata, na–missing ini kag ginpangita tubtob nakit-an sa sapa kag wala na sang kabuhi.
Nangin “person of interest” ang amo nga lalaki bangud siya ang nakit-an nga ulihi nga nakaupod sang bata.
Sa interogasyon sang pulis, nag-ako ang suspek sa krimen.
Naggwa sa imbestigasyon nga plano sang 14-anyos nga magulang sang biktima nga makigbulag sa suspek kag nagpaandam ang suspek nga may mapatay sa pamilya sang dalagita kun makigbulag ini.
Nahibaluan nga miyembro sang tumandok nga Mangyan ang mag-utod samtang Tagalog naman ang suspek nga lalaki.
Ginsiling naman sang 14-anyos nga dalagita nga luyag niya makigbulag bangud ginapilit siya sini nga makighilawas apang ginadumilian ini sa tradisyon sang mga Mangyan bangud indi pa sila kasal.
Preso na subong ang suspek kag nagapangatubang sang kaso nga murder.
