ILOILO CITY – Maga-abot na buwas, Abril 29, sa syudad sang Iloilo ang Ilonggo Overseas Filipino Workers nga na stranded sa Metro Manila.
Sa interview sang Bombo Radyo kay Atty. Roy Villa, legal counsel sang Metro Iloilo Water District kag spokesperson sang Regional Inter-Agency Task Force, iya ginpahayag nga nagalab-ot sa 178 ang official nga numero sang Overseas Filipino Workers nga magapauli sa Panay.
Suno kay Atty. Villa, sakay sa isa ka barko ang repatriates kag may yara pa sang masunod nga batch nga sa subong, ginaproseso na ang ila nga pagpaidalom sa COVID-19 test.
Ginpahayag ni Atty. Villa nga ang tagsa ka concerned agencies ang may yara sang nagakalin-lain nga katungdanan sa pagpapauli sa Overseas Filipino Workers.
Pag-abot diri sa syudad sang Iloilo, liwat nga ipaidalom sa 14-day quarantine kag COVID-19 test ang mga OFWs kag kun magnegatibo, mahimo na sila nga makapauli sa ila tagsa ka mga balay.
May kaangtanan naman sa pagdesisyon kun bala palawigon ukon indi ang quarantine sa isa ka lugar, ginpahayag sang natungdan nga kinahanglan nga ang Local Government Unit mismo ang magapasa sang sulat ukon assessment kag ang Regional Inter-Agency Task Force naman amo ang magapasa sini sa National level.
Ang Local Government Unit suno kay Atty. Villa ang mas nakahibalo kun ano na ang status sang lugar kun COVID-19 cases ang pagahambalan.
Sila sa Regional level ang magaserbe lamang nga koneksyon sa tunga sang Local kag National Level.
