Gin-file na sa Kamara ang House Bill 10258 nga nagaduso nga i-expand pa ang prangkisa sang More Electric and Power Corporation (MORE Power) sa second kag fourth district sa probinsya sang Iloilo.
Ini nga hagna ang ginduso sang mga mamalidha sa Iloilo nga sanday Iloilo City Lone Disrict Representative Julienne Baronda, Iloilo Second District Representative Michael Gorriceta, kag Iloilo Fourth District Representative Braeden John Biron.
Gin-amyendaran sini ang Republic Act No. 11212 kun sa diin una nga nahatagan ang MORE Power sang 25 ka tuig nga kalawigon sang prangkisa agud nga maka-distribute sang elektrisidad sa syudad sang Iloilo.
Sa interview sang Bombo Radyo kay Baronda, iya ginpahayag nga nagpanguna man sanday Biron kag Gorriceta agud nga makaambit man ang second kag fourth district sa probinsya sang mas barato nga kuryente.
Mangin healthy competition man ini suno kay Baronda kag isa ka hangkat para sa current electric distributor nga Iloilo Electric Cooperative (ILECO) agud nga i-improve pa ang ila nga serbisyo sa probinsya.
Apang ang problema suno kay Baronda amo nga may yara sang long-standing nga 50-year legislative franchise ang ILECO agud nga maka-distribute sang kuryente sa mga nasakpan nga mga banwa sa probinsya sang Iloilo.
Lakip diri nga mga banwa amo ang: Alimodian, Leganes, Leon, New Lucena, Pavia, San Miguel, Santa Barbara, kag Zarraga sa second district; kag Anilao, Banate, Barotac Nuevo, Dingle, Dueñas, Dumangas, San Enrique, kag Passi City sa fourth district.
Yara na sa Committee on Appropriations ang hagna kag ginalauman nga subong nga semana magaumpisa ang public hearing.
